القصيده :بدوية لعنبوا زين على غير بدوية
مل قلب دوبه الهوجاس في صبـح وعشيـة
كل مـا كنـه تريـح زاد همـه وإنشغالـة
لا فقدت الهم مثـل اليـوم عاودنـي قفيـة
وأستلمني هاجس كن له على صدري وكالـة
صرت أسير للهموم وصرت للهاجس ضحية
كل هاجوس ليا من راح جاء الآخـر بدالـة
هلت العين العبـار وضاقـت الدنيـا عليـه
من هواجيس لها وسط الحشا صالـه وجالـه
يا وجودي وجد من خصمه وزير الداخليـة
كل ماغـط بمنامـه ليـن ذا نايـف قبالـه
فز مثل الغافل اللي مونـسٍ لـه حـر كيـه
وقام يجفل في ظلام الليل حتى مـن ظلالـه
عسكري دهواه حظه وابتلى في العسكريـة
ما يبيها غير ما يبغـى يفـرط فـي حلالـه
وشاءت الأيام بأنه يتهـم لـه فـي قضيـة
من قضايا ما تفيد بهـا الوسايـط والكفالـة
أتهموه بذبحت إثنيـن مـن أفـراد السريـة
عينوهـم ميتيـن ولا لقـوا غيـره لحالـه
بصم المجني عليه وعينـوا بصمتـه زيـه
واثبتت على الضعيف وطاح في حكم العدالة
وصدر القصاص حكم الشرع في نفسٍ بريـه
بري منها بس ما عنـده ثبـوت ولا دلالـه
وجد حالي وجد من يبكي على فرقـا وخيـه
ما خبر غيره عضيد ولا بعد كبـروا عيالـه
والسنة دارت وهو ماذاق لـه عيشـة هنيـة
والشهر دور السنة من موتته شعشع هلالـه
كل ما عرض على قبره بكت عينـه شقيـة
ما جداه إلا البكاء والنـوح لامنـه طرالـه
يتذكـر جلسـة معـه وروحـات وجـيـه
ويتذكر فزعته لامن حصل في الوقت مالـه
حالتي بعض الليال أخس مـن حالتـه ذيـه
لا تذكرت الزمان اللي قصر دونـي ظلالـه
ما تحقق لي طموح ولا تحقـق لـي منيـه
والظروف القاسية ما بيـن ميلـه واعتدالـة
كل ما ظنيت ظـن وكـل مـا نويـت نيـة
قصر الحظ الردي من دون مطلوبي حبالـه
ولا تمنيت المطالب في عشي ولا ضحويـة
ما حدِ قد نال مـا يبغيـه فـي يـوم ولالـه
قد تعرضت المسافـات الطـوال السرمديـة
ولا اعتنزت إلا على رب البشر جل جلالـه
ممتحني عاد عمري عشر أو ينقص شويـه
لين حتى إني كبرت وشفت جوره وإحتيالـه
ثـم دهانـي علـةٍ مالـي عليهـا مقدريـة
علة من طاولته وضدتـه مـا طـاب فالـه
أعتلقني حب ملهوف الحشى جثـل الزويـة
كل ذا زودٍ على ما مر من حمـل وعبالـه
جادل تعجز توصفهـا الحـروف الأبجديـة
ابتليت بحبها وأصبحت فـي غـي وظلالـه
أسحرتنـي بالعيـون وبالخـدود النرجسيـة
كان به سحر حلال فوالله إن ذا مـن حلالـه
بدويـة لعنبـوا زيـن علـى غيـر بدويـة
لعنبوا جمال غير البدو واللـي هـو جمالـه
أشهد إن الزين لا جاء في البدو لـه قابليـة
وأشهد إن الشين في البدوان ما يطرا مجالـه
بعدها قم يا نديبي فوق حمـراء صيعيريـة
ما عليها إلا الشداد وراكب معـه الرسالـة
نصها ديرة هـل المجمـول مجلـي الثنيـة
خبر المجمول عن حالـي وخبرنـي بحالـه
قل له إني من نهاره راح وأنا أرجي مجيـه
ما قطعت اليأس من شوفه والأ من وصالـه
وقل له إن حبه على طول الزمن دين عليـه
يحسب إني داله عنـه وأنـا مانيـب دالـه
والله إن أموت ما سجيت وإن أكتب وصيـة
ورحمة الله ما تقصر دون مخلـوق يسالـه
دامني ما أخطيت وأعرف وش علي ويش ليه
فالعرب ما ينسلم من حكيهم في كـل حالـه
و يالله إنك لا تواخذنـي بذنـب ولا خطيـه
وتغفر ذنوبي يا عالم دق ذنبي مـن جلالـه
وتلطف بقلب جداه الهم في صبـح وعشيـه
كل مـا كنـه تريـح زاد همـه وإنشغالـه
